كلمة ونص-20-3-2008

[sab3aawy]

اثناء انحشارى بسيارتى (ريجاتا 85 نبيتى) فى زحام حى المهندسين بالأمس وفى لحظة توقف تام للحركة انشغلت خلالها فى التفكير فيما سأكتبه فى "كلمة ونص" اليوم حدث موقف اراه غريبا الى حدما، فخلفى على اليمين كان يوجد فارس من ابطال تسليم الوجبات الجاهزة يعتلى صهوة جواده من طراز الباجاج الهندى،حاول العبور من المساحة الضيقة جدا الموجودة بينى وبين السيارة المركونة على اليمين بجوارى، وبعد ان وصل الى منتصف المسافة وجد اعاقة ضخمة لمسيرته تتمثل فى مرآة سيارتى اليمنى (لسة مركبها من اسبوع بعد ما البواب كسر لى السابقة اثناء معركة الغسيل) ، نظر للمرآة للحظة ، ثم بمنتهى البرود-وبدون كلمة واحدة-راح قافل المراية بتاعتى وهو ينظر الى نظرة خاوية من داخل خوذتة المعدنية، انا بصراحة معرفتش انطق لاننى اصابنى ذهول لحظى من هذا القدر من الإقتحام والبجاحة، لكن على ما فقت ونزلت من السيارة لأفتح المراية المغلقة كان الفارس قد طار على حصانه النارى

كلما تصورت اننى رأيت سقف البجاحة فى بلدنا اكتشف ان هناك افاق جديدة للبجاحة يتم الوصول اليها يوميا

[Xpert]

انت لسه شوفت حاجه ... اللي جاي احلي ...

[SS]

معلش يا استاذ سبعاوى بس للاسف بقيت البجاحة سمة اساسية عندنا يعنى المشكلة مش اننا بنعمل الغلط بس لأ ده بنعمله بكل وقاحة و برود وكأنه حق مكتسب.. و ربنا يتوب علينا من العالم ديه.

[PRO-DRIVE]

لوووووووووووووووووووووووووول

قوول الحمد لله انو مكسرهاش ههههه


ربنا يعنينا :)

[cpt_shawky]

وهو ينظر الى نظرة خاوية من داخل خوذتة المعدنية،

:D:D:D:D:D:D:D:D:D:D:D:D

[tutankhamoun]

يتحول الشعب المصري تدريجيا و خصوصا سكان القاهرة الكبرى
إلى شعب عديم الإحساس ......... بجح .......... بارد ......... تلم ........ منعدم الضمير ........ و كل ما تتخيله من صفات سيئة

و تنسحب الصفات الحميدة من مجتمع المصريين تدريجيا كأنها ملت من حالة البرود و البجاحة التي يتمتع بها الناس

و كل شئ أصبح عادي جدا و ممكن واحد يحك سيارتك و يجري زي البقرة و لا كأن شئ حدث

-------------
و الحمد لله إن المرايا سليمة و مكسرهاش على رأي أخونا بورت ;)

[memo_hefnawy]

والله يا سبع أنا الأيام إللى فاتت دى حاسس إنى مع الضغوط اليومية المتاولبة فى الشغل و الحياه و الشارع بدأت أشعر إنى هاتحول لوحش ذى أى متخلف فى الشارع

بدأت أحس إن مع العصبية و الضغط الكثير الواحد بيخرج عن شعورة كثير أوى

طوول اليوم فى الشغل تليفونات و إيميلات و طلبات تنهمر من كل مكان فوق راس الواحد و كل حد عايز شغله يخلص فى التو و الحال تنزل من الشغل تلاقى بقر راكبين عربيات و كلاب ضاله تعبر الطريق (همه مش كلاب بس بيقلدوا الكلاب فى طريقة العبور) و فرسان راكبين فيسبات (الطيارين) و غيلان راكبين مينى باصات و باصات كبيره و مساطيل راكبين تاكسيات و قول ذى ما تحب على الملاكى للصبح و الميكروباص

طبعا أنا بواجه كل ده بعد متوسط من 10 - 12 ساعه شغل أمام شاشة المحروق الكومبيوتر و مع رنين التليفونات المتواصل مع ركبة يمين بتنقح عليك من السواقة مع صداع من زحمة و ضغط الشغل

بدأت أحس إنى بتحول لوحش ممكن يدوس أى حد يرخم عليه فى الطريق إنت عارفنى بطبعى مش بستحمل الإستهبال بتاع الناس أو البرود و مش بطيق حد ياخد حارتى منى بالعافية أو بطريقة رمى البوز أو الزلومه فمع التغيرات دى بقيت سواقتى ذات طابع عنيف أكثر و هجومى أكثر - آه مش برخم على حد بس بقيت حاسس إنى علاطول عصبى ممكن أنزل أرمى واحد من فوق الكوبرى لو زنق عليا ممكن أتخانق من أقل حاجة ممكن ممكن ممكن أى حاجة

بجد الحياه بقت تقرف ما بين المهندسيين لمدينة نصر

[ابو سيف]

طيب دة كان طيار محترم جدا انه قفل المرايه

انت زعلان يعني علشان مقالكش قبل ما يقفلها؟؟؟ دة انتو حاجة غريبه اوي .... الراجل كتير خيره لما بص للمرايه اختارلك الصح و قفلها بدل ما كان يكسرها

انت عارف لو كنت نزلت زعقتله؟؟... كان ممكن يرد عليك بمنتهى البجاحة و يقولك مش بدل ما تتكسر؟؟:) و دة حقه المكتسب الراجل عايز يوصل الاكل سخن للزبون :)

و في الاخر بعد كل اللى بنشوفه من الطيارين يا ريتهم بيجوا بدري و لا بيجيبوا الاكل سخن بصحيح :d :d

الا هوا صحيح سموهم طيارين ليه؟؟ :d

على فكرة يا باشمهندس سبعاوي انت معتقد ان الاخ دة كان ممكن يعمل ايه كويس و محترم عشان انت تحس انه عمل الواجب فعله؟؟؟ انه يستأذنك و يستنى لما تسمحله و يقفلها و يكون بأسلوب مهذب طبعا؟؟؟؟
لو هوا كدة فعلا يبقا انسى ......
احب اقولك انه يستحيل اصلا يجي في دماغ هذه الفئه الموضوع دة و صدقني قد تكون الاكثر حظا و سعادة في جمهوريه مصر العربيه لو بس كان قبل ما يقفلها و يمشي يقولك انا هقفلها و يقفلها على طول دون النظر على رد فعلك او انه يقفلها و يبتسملك بكل بلادة و تناحه و يمشي بردو :)

و يجعله عامر

[Ayman_Abdullah]

هههههه
ياعم سبعاوى فعلا والله ده حصل معايا من كام يوم نفس الموقف
بس الصراحة انا مكنش فارق معايا لأنى مبستعملهاش أصلا:d:d

[محمد ابراهيم 1]

المجتمعات غير الديموقراطيه والتى يشعر الناس فيها أنهم غرباء ولا يأخذون حقوقهم يضعف لديهم إحساس المواطنه والذى بدوره يسبب حاله من عدم الإكتراث نتيجه إنفصال الناس عن المشاركه السياسيه وصنع القرار
فعندما تذهب للإدلاء بصوتك ويتم منعك من الدخول أو تزور الإنتخابات فيتولد لديك شعور تلقائى بالكراهيه تجاه هذا الوطن

يغذى ذلك الشعور ما نراه من تقدم وحريه وقدره على محاسبه المسئولين فى الدول الاخرى ونلاحظ اهتمام المصريين بالإنتخابات فى دوله اسرائيل وذلك لإحساسهم أنها دوله حره يأتى الرئيس فيها بأصوات الشعب
وأعتقد ان المصريين عندما يحصلون على حريتهم سوف تجد شعبا آخر بتصرفات راقيه

[tutankhamoun]

المجتمعات غير الديموقراطيه والتى يشعر الناس فيها أنهم غرباء ولا يأخذون حقوقهم يضعف لديهم إحساس المواطنه والذى بدوره يسبب حاله من عدم الإكتراث نتيجه إنفصال الناس عن المشاركه السياسيه وصنع القرار
فعندما تذهب للإدلاء بصوتك ويتم منعك من الدخول أو تزور الإنتخابات فيتولد لديك شعور تلقائى بالكراهيه تجاه هذا الوطن

يغذى ذلك الشعور ما نراه من تقدم وحريه وقدره على محاسبه المسئولين فى الدول الاخرى ونلاحظ اهتمام المصريين بالإنتخابات فى دوله اسرائيل وذلك لإحساسهم أنها دوله حره يأتى الرئيس فيها بأصوات الشعب
وأعتقد ان المصريين عندما يحصلون على حريتهم سوف تجد شعبا آخر بتصرفات راقيه

لا أتفق معك يا اخي في هذا الرأي

الحالة الإقتصادية للناس هي الفيصل الكبير ووجود قانون رادع
و أكبر دليل
دول الخليج ........... الناس حالها ميسور .......... هناك قانون صارم مع أنه لا يوجد ديمقراطية !!

[محمد ابراهيم 1]

لا أتفق معك يا اخي في هذا الرأي

الحالة الإقتصادية للناس هي الفيصل الكبير ووجود قانون رادع
و أكبر دليل
دول الخليج ........... الناس حالها ميسور .......... هناك قانون صارم مع أنه لا يوجد ديمقراطية !!

أتفق معك فى مسأله القانون الصارم الذى يطبق على الجميع
المشكله فى مصر ليست مشكله تشريعات أو قوانين المشكله مشكله تطبيق وتفعيل القوانين
فاكرين العباره
القوانين المصريه من قبل حدوث كارثه العباره وهى لا تسمح بإبحار السفن الغير صالحه
بمعنى آخر إن القوانين المصريه لو طبقت لم تكن لتسمح لهذه العباره بالإبحار
ولكنه الاهمال وعدم الاكتراث والتواكل على الله
الشرطه فى مصر غائبه وذلك لإهتمامها بالأمن السياسى على حساب الأمن الجنائى
كذلك الحال فى قانون المرور
لا يوجد تفعيل له الا قليلا
القانون لا يطبق على الجميع
بالمناسبه الرئيس بوش ذهب لزياره ابنته المحتجزه فى قسم الشرطه وذلك لتناولها الخمر وهى دون السن والتى حكم عليها بالخدمه العامه ونفذت العقوبه
الأهم من القوانين أن يحب الناس وطنهم
إذا أحببت وطنك إكترثت له واهتميت من أجله لن ترضى بإلقاء قمامه فى الشارع ولن تسمح لأحد بإتلاف شىء فيه
اننا نفتقد احساس المواطنه

[aif]

انا لا اتفق معكما
اعتقد ان ده اسمه اخلاقيات الزحام
وممكن ما تلاقيش الكلام دة بنفس الدرجة في العاشر من رمضان مثلا عشان الزحمة عندهم اقل
مجرد رأي

[ahmedsiyam]

الاخ سبعاوى
انا قدام البيت عندى فرع بيتزا هت و كنتاكى و موش عايز اقولك باتفرج كل يوم على مساخر الطيارين بتوع التوصيل و هم داخلين على الشارع او خارجين منه و كتير جدا كان بيبقى حد منهم على وشك انه يدخل و يرشق فى عربيتى و الاقيه قاعد جنبى بس الحمد لله ربنا بيستر
فى واحد منهم سواقته ضعيفة شوية و كان بيتصادف انه وقت الفطار فى رمضان يطلع جرى من الفرع و يروح فى الاخر متزلحق بالطيارة بتاعته دى فى اخر الشارع علشان بياخد الملف على الضيق و يضحك الناس عليه انت متخيل كل يوم تقريبا كان بيعمل الحركة دى ( ربنا يصلح حاله و حالنا و حال الناس )
انا متفق مع توت تماما فى ان الشعب المصرى بدء يتحول لشعب عديم الاحساس تماما
تبقى واقف فى الزحمة و تلاقى اللى بيصتنصح و يعدى من يمينك و من شمالك و الغبى ده موش فاهم انه عدى دلوقتى بس هى واقفة قدام
و ده بقت اخلاقيات الناس فى كل حاجة و مبدء انا اولا و من بعدى الطوفان
و عموما ان صلحت الرعية صلح الراعى و الناس تبدى بنفسها و تصلح من نفسها بدل ما ربنا يسلط علينا اللى لا يخافه و لا يتقى الله فينا