طريق واحة سيوة

[kero25]

انا عايز اسافير سيوة انشاء الله بس عايز اعرف اقرب طريق بلعربية ازاى وهل لاحد اى معلومات عنها

[blazer]

والله اعلم من مطروح بيبتدى طريق الواحات :)

[amr mokhtar]

إيه يا جماعة محدش راح سيوة قبل كده
انا برضه عايز أعرف إيه أخبار الطريق و هل فيه ملفات و جامدة و لا لأ؟
و البنزين متوفر على الطريق و لا إيه النظام؟؟

[dentalbibo]

يا ريت حد يفيدنا :)

هو انا لو اخدت زمايلي وطلعنا هناك كده بدون حجوزات ولا يحزنون .. نعرف نظبط الليلة ولا هتبقا نكد ؟!

[kero25]

والله انا ناوى اعمل كدا زيك وهطلع من غير تظبيت بس انا دورت شوية فى النت لقيت ان الحاجة هناك رخيصة من سكن واكل كدا واحلا شهر هناك شهر 10 عشان بيكون موسم جمع البلح بيكون فية افراح وموالد وكدا انا ناوى إن شاء الله لو ربنا اراد هطلع على اخر 10 بس بشوف حد عندوه معلومات عنها عشان انا سمعت ان فى طربق مختصر من القاهرة لسيوة مسفته 400 ك بس عايز اتاكد من المعلومة

[islamnabil]

ياريت لو وصلت لاي معلومات تقول لنا عشان الموضوع يبقى مرجع للي عايز يروح سيوة

[kero25]

انا إن شاء الله هطلع يوم 22 ولما ارجع هقول على كل التفاصيل إن شاء الله

[Islam_galal]

أنا مطلعتش قبل كدهبس جمعت معلومات بسيطة عن مخاكر الطريقهو تقريبا 200كم بعد مطروحالوصلة من مطروح لسيوه ليس عليها خدمات علي الاطلاق، اللهم الا كافيتريا فقيرة جدا و شبكات المحمول بتفصل كتير علي الطريقأعتقد كده علي الأقل سيارتين معا في السفر لأن واحدة حتبقي مخاطرة كبيرة خصوصا لو فيه ستاتو الله أعلم

[amr mokhtar]

الحمد لله انا كنت لسه فى سيوة من حوالى إسبوع كده و هحكي شكل الطريق

الجزء الأول
إحنا إتحركنا من الإسكندرية بعد صلاة الفجر مباشرة و كان معانا عربيتين
الطريق من الإسكندرية لمطروح حوالى 300 كم الطريق كويس مفيش فيه ملفات خطر لكن بعد مارينا ممكن تلاقى كام نقرة فى الأرض

الجزء التانى
الجزء الأهم من الرحلة و اللى يقلق هو طريق سيوة
سيوة تبعد عن مطروح تقريبآ300 كم (مطروح فى النص) الطريق عبارة عن حارة رايح و حارة جاى أحيانآ بيبقى ضيق شوية لدرجة انك تحس ان العربية اللى بتعدى من جنبك بتبقى قريبة اوى...لكن هو أصلآ كل فين و فين لما بتلاقى عربية معاك فى السكة

بعد 30 كم من بداية الطريق فيه منطقة عمل يعنى الطريق فى الحتة مش متسفلت عبارة عن رمل و زلط فطبعآ لازم تاخد بالك لإن بيبقى فيه طوب مرمى و الجزء المكسر ده حوالى 14كم

بعد كده الطريق حلو و مستقيم معظم الوقت و ملفاته كويسة

بالنسبة للخدمات فهو مفيش عليه اى حاجة و لا محطة بنزين و لا غيره عشان كده إحنا ملينة جركنين بنزين كل واحد 10 ليتر للأمان يعنى

جوة سيوة فيه محطة بنزين و فيها بنزين 92 كمان

و إحنا راجعين طلعنا على الطريق بالليل - بصراحة الطريق كان كئيب جدآ و نصيحة بلاش حد يطلع عليه بالليل لإن لا قدر الله لو العربية عطلت او حتة عجلة نامت الدنيا بتبقى كحلى بمعنى الكلمة

و برضه بلاش تطلع بعربية واحدة يستحسن يكون فيه أكتر من عربية عشان الونس برضه

بس بجد سيوة تستاهل .. فعلآ جنة بجمالها و ناسها اللى تحس فيهم الطيبة

[Islam_galal]

تعمل فينا معروف و تحط صورة من علي خرائط الجوجل
- طريق سيوة منين من مطروح ، يعني قبل دخول مطروح و لا من جواها؟
- موضوع شبكة المحمول علي طريق سيوه أخباره إيه
- و ياريت الاسعار كمان بالمرة

معلش حانتعبك شوية

[abou_ruqi]

انا لسه كنت هناك في العيد طلعت بعربيتي من اسكندية بعد الفجر وصلت الفندق الساعة ١٢

الطريق كويس مع عدا الحتة اللي بيصلحوها الكيلو ٣٠ زي ما قال الاخ الكريم

لازم تدخل مطروح علشان تمسك الطريق وكمان علشان تمون بنزين انا يا دوبك التنك كفاني لحد سيوة

الطريق في نهاية شارع سوق ليبيا الشارع اللي فيه عمر افندي اللي بيوازي الكورنيش وده اكبر شارع بعد شارع اسكندرية


في حاجة مهمة قوي الطريق ده بدايته هو نفسه طريق السلوم فلو ما اخدتش بالك من اللفة حطروح في خبر كان و حنجيبك من ليبيا :)

الفنادق المعقولة هناك

كليوباترا ٠١٠٣٣٤٠٧٨٤
الكيلاني ٠٤٦٤٦٠١٠٥٢ مكيف
نيو ستارز ٠١٠٢٩٥٧٩٢٦ هو مطعم و ملحق بيه شاليهات واكله ممتاز ممتاز ممتاز
عروس الواحة ٠٤٦٤٦٠٠٠٢٨

شبكة فودافون تعمل في كل مكان هناك ما واجهتش اي مشكلة حتي لما طلعت سفاري في الصحرا والله آعلم بالشبكات التانية لان كان كلنا فودافون

اخيرا الطريق من اسكندرية لمطروح ٢٨٠ كيلو ومن مطروح لسيوة ٣١٥ ومفهوش اي خدمات لا كاوتش و لا ميكانيكي ولا بنزين طبعا فمحدش يطلع بعربية نص نص

حد عاوز حاجة تانية ؟؟؟

[islamnabil]

ياسلام بقى لو الناس اللي راحت تقول لنا على التكلفة وشوية تفاصيل كدده
يعني الفنادق اسعارها ايه
و الانشطة اللي هناك ايه و تكلفتها كام
الواحد يعمل حسابه ان الرحلة تكون كام يوم
عشان الواحد يكون عنده تصور كامل للرحلة و يكون الموضوع ده مرجع لسيوة
جزاكم الله خيرا

[hamdy321]

مية مية الموضوع ده و في انتظار ردود اللي جربوا الطريق قبل كدة
يحكولنا بالتفصيل عن كل شئ في الرحلة

[abou_ruqi]

ياسلام بقى لو الناس اللي راحت تقول لنا على التكلفة وشوية تفاصيل كدده
يعني الفنادق اسعارها ايه
و الانشطة اللي هناك ايه و تكلفتها كام
الواحد يعمل حسابه ان الرحلة تكون كام يوم
عشان الواحد يكون عنده تصور كامل للرحلة و يكون الموضوع ده مرجع لسيوة
جزاكم الله خيرا

فندق عروس الواحة الغرفة الدبل بحمام داخلي ٥٠ جنية لليلة يضاف ١٠ جنية للفرد لو عاوز تفطر و منصحكش ، عليك و علي مطعم عبده اللي في السوق حتلاقي كل الناس بتفطر هناك الصبح

فندق كليوباترا نفس الاسعار

فندق النخيل اللي بنزل فيه ب ٧٥ الليلة (انا بنزل فيه علشان التواليتات انضف )

الانشطة هناك آهم حاجة تعمل سفاري و تروح بير واحد والعين البارة وده بالجيب تكلفة الفرد في الموسم ١٠٠ جنية وفي غير الموسم ٧٠

ممكن تروح عين كليوبترا و عين آبو شروف وتطلع جبل الموتي و جبل الدكرور وتزور معبد آمون وقاعة تتويج الاسكندر وتروح بحيرة سيوة وتشوف فطناس وتطلع مدينة شالي الاثرية
وكل ده ببلاش
آهم حاجة تكون دايما لابس مايوه لآنك مش حتمسك نفسك و حتنزل في كل دول

فما فيش تكاليف خالص

ووانت راجع تاخد معاك زيتون آخضر فظيع وزيت زيتون بكر تحفة

وتدعيلي

[kero25]

اه ياريت انا مسافر إن شاء الله كمان اسبوع ياريت اعرف اعدتوة اد اية هناك وهى محتاجة كام يوم عشان تستمتع هناك
وبعدين سفارى بتتكلف كام وفيها بيات ولا لأ ولو حد معاه نمرت حد هناك كويس ياريت عشان انا نفسى بجد اروح من زمان وبظبيط من بدرى عشان مش عايز يحصل حاجة هناك
انا من القاهرة وسمعت انك ممكن تروح عن طريق الفيوم اقرب من مطروح الكلام دة صح ولا لأ
وسمعت ان فى فندق هناك كويس اسمة يوسف ولا حضرتكوا يا ( ruqi) & ( karim ) اعتدوه فين هناك وأديتوة وقتكوا هناك ازاى واية اخبار الاكل هناك رخيص ومتوفر ولا ظروفة اية
والصبح اية ممكن يتعمل واية بليل ممكن يتعمل
اسف على الاطالة بس بجد عايز اعرف اكبر معلومات عشان بس تكون رحلة كويسة ومتظبطة صح