لمالكي الافيو (هام)

[tafa17]

السلام عليكم ورحمه الله وبركاته
طبعا لازم اكتب كلمة هام دي علشان كله يخش يقرأ
المهم انا غيرت اللمبات الامامية في الفوانيس اللي بتشتغل مع نور التابلوه الي ابيض تلجي علشان انا مركب اصلا زينون وبصراحة لونهم كان تحفة وأن شاء الله هارفع الصور قريبا
وعلي فكرة انا جبت نوع نظيف Philips وانا اللي ركبتهم و اوعي حد يخاطر و يجرب قبل ما يقوللي الاول وانا اقولك يعمل ايه علشان مكان اللمبات دي رخم و طلع عيني و انا فضلت اركبهم بنفسي بدل لما اروح لكهريائي يقوم يكسر الفانوس او يشرخه
وشكر

[samehafez]

طب يا ريت يا باشا تقولنا كمان علي الاسعار

[tafa17]

سعر اللمبتين 30 جنيه ماركة Philips بس انا حاسس انهم ممكن يكونو ارخص من كده بس بصراحة هما جايين متغلفين زي لو رحت اشتريت فلاش ميموري نفس الغلاف

[وائل عطية]

سعر اللمبتين 30 جنيه ماركة Philips بس انا حاسس انهم ممكن يكونو ارخص من كده بس بصراحة هما جايين متغلفين زي لو رحت اشتريت فلاش ميموري نفس الغلاف

جبتهم منين ؟

[fahmy]

ياريت الصور

[tafa17]

محل اسمه المدينة في شارع دمشق امام محطة البنزين (اعتقد التعاون) خلي محل السجان علي ايدك الشمال وهو رابع او خامس محل بعديه
بس حاول تفاصل معاه في السعر

[Rembrandt]

ياريت لو ترفع الصور

[Mohsabrys]

ياريت يا باشا تورينا صورهم على العربيه عشان ناوي اركبهم عندي .. وياريت تقولي كمان ايه اخبار الزينون معاك ؟؟ نوعه ايه ؟؟ بكام ؟؟؟ منين ؟؟ وطمنا عليك =] وربنا يباركلك ...

[tafa17]

ياريت يا باشا تورينا صورهم على العربيه عشان ناوي اركبهم عندي .. وياريت تقولي كمان ايه اخبار الزينون معاك ؟؟ نوعه ايه ؟؟ بكام ؟؟؟ منين ؟؟ وطمنا عليك =] وربنا يباركلك ...

بص يا سيدي بالنسبة للصور كل يوم وانا طالع البيت انسي آخد كرتونة اللمض من العربية بس علشان خاطر الناس اللي معاها افيو هافتكر
وبالنسبة لموضوع الزينون دي بقه حاجة مهمة قوي ، بصراحة انا رحت الي كلاريون اللي امام عمرو افندي ميدان الحجاز مصر الجديدة اللي مسئول عن اي تركيب السنتر او اي حاجة ناوي تركبها في الافيو او الاوبترا علشان هو منصور شيفروليه معتمد المركز ده بالنسبة لضفيرة العربية
يعني مثلا انا جبت حساسات خلفية علشان لما اركن السيارة تقريبا مش بشوف ضهر العربية خالص فرحت ركبتهم عنده (ملحوظة)موضوع الحساسات للافيو مهم جدا لأني مهما حاولت احفظ ابعاد السيارة للأسف صعب جدا ده انا لو شوفت طرف الشنطة ده حاجة تبقي كويسة بس برده الاكصدام الخلفي فيه بروز وبالطريقة دي بحافظ عليه ، المهم نرجع للزينون سألت مركز كلاريون كام سعر الزينون عندك قاللي حوالي 1150 بس نوعه كوري وعليه ضمان سنة قولت كويس احب اجيب الحاجة كوري وبضمان بس في واحد صاحبي قاللي علي محل في شارع دمشق عنده زينون و لسه كان مركبه في لانسر بس نوره جامد جدا احسن من اللي مركبه في عربيته و هوه عنده اوبترا وبرده مركب زينون وأخذت منه كارت الراجل اللي في شارع دمشق و توكلت علي الله و عملت بحث في شارع دمشق كله علي انواع الزينون والاسعر كانت برده مهمة ، المهم لقيت اسعار من 750 جنيه حتي 1000 وكله صيني و كذا واحد اقوله علي الكوري اللي شوفته في ميدان الحجاز عند كلاريون ، يقولي يا باش كل حاجة بقيت صيني حتي ماركة بوش الالماني هي بقت صيني ، المهم في الآخر رحت المحل اللي معايا الكارت بتاعه اسمه vixon وده وانتا في شارع دمشق في اتجاه ميدان روكسي هيكون علي ايدك اليمين قبل موقف الاتوبيس اللي هناك ، وقعدت مع الراجل اللي في المحل و بصراحة عجبني نوع الزينون اللي عندهم و هوا خلاني شوفته علي عربية اسبرينزا الاول و معاه ضمان سنة ونصف وسعره 1200 وبرده صيني بس الاضاءة فعلا تفرق عن اي زينون تاني ، انا مرة كنت راجع علي طريق مصر الاسكندرية الصحراوي و كان في عربية ورايا كانت مركبه زينون ، بصراحة اتعميت لما بس قلب العالي و الزينون اللي عند الراجل ده اعتقد انه نفس القدرة
وكنت خايف من التركيب علشان السيارة مش تخرج من الضمان يعني يقشر سلك او يوصل توصيلة كده ولا كده فالمهم لقيت ان كل الموضوع عبارة عن فيش ، الفيشة اللي رايحة للمبة اللي في الكشاف بيخدها و يركبها في توصيلة تانية يعني بالاصح مابيجيش ناحية اي سلك خالص والارضي والكهرباء بتاع الزينون بياخدهم مباشرة من البطارية و كنت خايف برده ان يحفر في صاج السيارة علشان يثبت الموديول فلقيته قاللي انا هاربطهم برباط اللي هو الكوليه البلاستيك زي اللي بنربط بيه الطاسات علشان متقعش من العربية و بصراحة هو ربط المديول الواحد 4 اربطة وثبتهم كويس في العربية ، والموضوع كله لم يأخذ اكثر من ربع ساعة
و هو المحل ده اصلا وكيل الماركة دي وهوا اللي بيستوردها وبصراحة الاضاءة كانت فعلا شديدة جدا علي غير ما كنت متوقع و قعدت اقارن كل عربية مركبة زينون بالزينون اللي ركبته لقيت في فرق كبير عندي للأحسن و يوميها اتشتمت كتير وانا ماشي علشان الاضاءة كانت عالية في وش اللي سايق و بعدين اضطريت اني اوطي الكشافت تحت شوية علشان الناس ، والمهم ان الزينون درجات وهو بيتقاس بالكيلفن يعني في 400 كيلفن وفي 600 ، 700 ، 800 ، 900 ، 1000 وكله حسب درجة الاضاءة واللون يعني في زينون ابيض ابيض و في ابيض اصفر وفي ابيض ازرق وبصراحة انا كنت خايف من موضوع المرور بس الحمد لله محدش وقفني خالص وبقالي شهر مركبه ، واللي راكب عندي 1000 كيلفن يعنمي اضاءة شديدة و ابيض ازرق بس ازرق فاتح مش داكن زي ماشفت في بعض السيارات بس ياسيدي ده موضوع الزينون وانا جربت السفر بيه كذا مرة بس كان ممتع بس المشكلة اني ساعات مش بعرف اشغله كتير علشان وانا برده منزل الكسافات تحت بيضايق الناس بس العالي بتاعة يعمي وعلي فكرة هو بياخد حوالي اقل من دقيقة علشان درجة الاضاءة تشتد لأنه اول لما تشغله بيبتدي يسخن وياخد حوالي دقيقة علشان يصل الي اقصي درجة اضاءة

[tafa17]

بس انا نسي اقول حاجة ان الواحد بعد لما يركب زينون ساعات بيحس ان الاضاءة واطية مش زي اول مرة كنت مركبه وده نتيجة ان عينيك خدت عليه زي الروائح كده اول لما تجيب ريحة جديدة تشمها اول يومين وبعد كده ما تحسش بيها وتحس ان ريحتها مش قوية او بطير علي طول ، وساعات بحس اني ندمت اني ركبت زينون علشان بحس اني طول الوقت طافيه علشان الاضاءة عالية وبرده بعد لما وطيت الكشافات في ضي خفيف هتلاقيه في عربية اللي قدامك في الصالون الداخل يعني الزينون مش مركز في مراية اللي قدامك لاكن الضي هو اللي منور صالون اللي قدامك ارجو اكون استوفيت موضوع الزينون بالنسبة للأفيو والافادة

[tafa17]

تم رفع الصور

هذه هي الصور

ودي الظهر



بس اللمبات اللي في الكرتونة بتاعت الافيو الاصلي ، اللمبات الحقيقية لونها بنفسجي شوية انا مش لقي مكان اشيلهم فيه غير كارتونة اللمبات الكريستال

[tafa17]

انا رفعت الصور علي الرابط ده

http://nilemotors.net/Nile/showthread.php?t=64559