الموضوع: كيفية تلميع السيارة...بالصور!

من يوم ما جبت العربية و انا مش راضي عن لونها البهتان...عشان كده قررت اني المعها و احاول أرجع الاسود يلمع تاني...كنت ناوي اعملها عند واحد بس قلت اعملها بنفسي احسن...

حاجة مهمة قبل ما تبدأ تشميع انك تكون مديها وش بوليش و تغسلها كويس...انا استعجلت و شمعتها علطول من غير البوليش...عشان كده النتيجة المفروض تطلع احسن...

اتأكد انك هاتشتغل في مكان مظلل و بعيد عن اشعة الشمس المباشرة و التراب..

الأدوات المستخدمة:

كيس قطن طبي


كومباوند لازالة الخدوش :


واكس Armor-All صناعة امريكية من كارفور...تمنه 30 جنيه


سبراي WD-40



و فوطة قطنية ناعمة

و كاسيت و تشغل فيه حاجة تسليك:)

_________________________
أول حاجة هتغسل العربية كويس من التراب اللي عليها

تاني حاجة هنبدأ نشوف الخدوش الصغيرة اللي في العربية و هنحاول علي قد ما نقدر نشيلها بالكومباوند..(ما تنتظرش نتيجة وهمية)

تاخد شوية من الكوماوند في صوابعك و تبدا تدعك بيهم الخدش








و بعدين تجيب قطعة من القطن الطبي و تبتدي تدعك الكومباوند في شكل دائري بيها لحد ما يطلع خالص



و خد باللك لازم تغير حتة القطنة علطول اول ما تحس انها مش بتشيل حاجة...يعني متوفرش فيهم...الكيس كله ب 2 جنيه و نص:D

خلصنا ازالة الخدوش...دلوقتي جت مرحلة وش البوليش....اللي للاسف انا معملتهوش

لازم تدي العربية كلها وش بولش كامل قبل التشميع

نيجي لمرحلة التشميع:

الشمع جاي معاه سفنجه...هيه دي اللي هنوزع بيها الشمع علي العربية


هنغمز في العلبة كأننا بنغمز في طبق الفول


هنبدأ نوزعه علي العربية في شكل دائري




هتسيبه 5 دقائق و تمسح بعد كده بالفوطة الناعمة..

يمكنكم ملاحظة الفرق:


اكتشفت ان الدهان بتاع العلابية طلع ميتاليك:D

كمل بقى باقي اجزاء العربية بنفس المنوال ولشتغل في كل جزء لوحده...يعني باب باب...كده يعني

و انا شغال قلت اجرب اعمل علي الفوانيس....لاقيتها عملت شغل جامد جدا:D و الفونيس هسه كمان رجعت تلمع...


بالمره بقي عملت الزجاج الامامي و الخلفي....هما كمان بقوا يلمعوا:D

خلصت مرحلة التشميع...نيجي لمرحلة تلميع البلاستيك و الفبر الخارجي:

هنجيب عبوة الWD-40 و نرشها علي حته قطن كبيرة....بس ماترشش كتير:



هنلمع بيها الأجزاء البلاستيكية اللي مش مدهونة...زي المرايات و الباكيتات و مقابض الابواب و الشبكة....




طبعا كلاحظين الفرق كبير قد ايه....بس طبعا اوعي تسيب المنظر كده...احنا مش عايزين المراية يبقي لونها بني من التراب...هاتجيب القماشة الناعمة اللي اشتغلنا بيها في التشميع و هنمسح كويس الWD-40 ...هتلاقي المراية بقي لونها اسود مطفي جميل...و مش ملزق...كأنها خارجة من المصنع....ميزته بقي انه مش هيلم تراب نهائيا

و اخيرا بعد 4 ساعات شغل....ديه كانت النتيجة:





طبعا ملحقتش اتهني بالللمعة الجميلة ديه...مفيش يومين و العربية بقت زي الزفت من الشوارع بتاعتنا:D:D:D:D:D

_____________________________

اتمني اني اكون افدتكم....و اخيرا عملت الموضوع اللي بقاللي شهر عايز انزله علي المنتدي:D

_____________________________________
تم تثبيت الموضوع مؤقتاً تمهيداً لاضافتة لقائمة المواضيع المميزة بالقسم التعليمي.

مشـرف القـسم.

أنا استخدمت الفوطة اللي انت شايفها ديه...هي تعتبر فوطة مطبخ بس ناعمة...و كانت اول مره تستخدم


و طبعا ممكن تستخدمه علي الاكصدمات عادي جدا مافيش أي مشاكل:)